ಪರುಶುರಾಮನ ಗರ್ವಭಂಗ ಕಥೆಯ ಭಾಗ 02..!!

ಅಯೋಧ್ಯೆಯಲ್ಲಿ ಸಂಭ್ರಮವೋ ಸಂಭ್ರಮ. ಮಹಾರಾಜ ದಶರಥನು ತನ್ನ ಮಕ್ಕಳು ಮತ್ತು ಸೊಸೆಯರೊಂದಿಗೆ ನಗರಕ್ಕೆ ಹಿಂದಿರುಗಿತ್ತಿರುವ ಸುದ್ದಿ ತಿಳಿದು ಇಡೀ ಜನತೆಯೇ ಸ್ವಾಗತಕ್ಕೆ ನಿಂತಿತು. ಊರನ್ನೆಲ್ಲಾ ತಳಿರು ತೋರಣಗಳಿಂದ ಅಲಂಕರಿಸಿದರು. ಸ್ವಾಗತ ಕಮಾನುಗಳನ್ನು ಕಟ್ಟಿದರು. ಎತ್ತರವಾದ ಧ್ವಜಸ್ತಂಭಗಳನ್ನು ನೆಟ್ಟು ಪತಾಕೆ ಗಳನ್ನು ಹಾರಿಸಿದರು. ರಾಮನ ಪರಾಕ್ರಮವನ್ನು ಕೊಂಡಾಡುವ ಸ್ವಾಗತ ಗೀತೆಗಳನ್ನು ರಚಿಸಿದರು. ದಶರಥನ ಪರಿವಾರ ಅಯೋಧ್ಯೆ ತಲುಪಿದಾಗ ಮಂಗಳವಾದ್ಯಗಳು ಮೊಳಗಿಸಿದರು. ಬೃಹತ್ ಮೆರವಣಿಗೆಯಲ್ಲಿ ಅವರನ್ನು ಅರಮನೆಗೆ ಕರೆದೊಯ್ಯದ ಭವ್ಯವಾದ ಸ್ವಾಗತ ಸಮಾರಂಭವನ್ನು ನಡೆಸಿದರು ಅರಮನೆಗೆ ಮತ್ತು ಇತರ ಜೋಡಿಯನ್ನು ಎಲ್ಲರೂ ಮೆಚ್ಚಿದರು. ನವದಂಪತಿಗಳನ್ನು ಊರವರೆಲ್ಲಾ ಹಾಡಿ ಹರಸಿದರು. ನವವಿವಾಹಿತರು ಹೊಸ ಜೀವನ ಆರಂಭಿಸಿದರು.

ರಾಮ ಸೀತೆಯರದು ತುಂಬ ಅನುರೂಪವಾದ ದಾಂಪತ್ಯ. ಇಬ್ಬರೂ ಒಂದು ಮನಸ್ಸು ಎರಡು ದೇಹ ಎಂಬಂತೆ ಇದ್ದರು.ಅವರು ಪರಸ್ಪರ ಪ್ರೀತಿಯಿಂದ ಇದ್ದರು. ಧರ್ಮಕಾರ್ಯಗಳನ್ನು ಎಂದಿಗೂ ಮರೆಯಲಿಲ್ಲ. ಬಹಳ ಶ್ರದ್ಧೆಯಿಂದ ಹಿರಿಯರಿಗೆ ಧರ್ಮಾಚರಣೆಯಲ್ಲಿ ನೆರವಾಗುತ್ತಿದ್ದರು. ಗುರು-ಹಿರಿಯರ ಬಳಿ ವಿನಯದಿಂದ, ಭಕ್ತಿಯಿಂದ ನಡೆದುಕೊಳ್ಳುತ್ತಿದ್ದರು. ಚಿಕ್ಕವರನ್ನು ಪ್ರೀತಿ-ವಿಶ್ವಾಸಗಳಿಂದ ಆದರಿಸುತ್ತಿ ದ್ದರು. ಮನಸ್ಸಿನಲ್ಲಿ ಒಂದು ರೀತಿ, ನಡೆದುಕೊಳ್ಳುವುದೇ ಇನ್ನೊಂದು ರೀತಿ ಎಂಬಂತೆ ಇರಲಿಲ್ಲ. ಎಲ್ಲರೂ ನಮ್ಮವರೇ ಎಂಬಂತಹ ವಿಶಾಲ ಮನಸ್ಸು ಅವರದು. ಅವರ ಆದರ್ಶ ಬದುಕನ್ನು ಕಂಡು ಎಲ್ಲರೂ ಸಂತೋಷಿಸುತ್ತಿದ್ದರು.