ಮದುವೆ ಆಗಿ ಪ್ರೀತಿ ಮಾಡಿದ ದಂಪತಿಗಳ ಕಥೆ

ತುಂಬಾ ಜನ ಹೇಳುವುದನ್ನು ಕೇಳಿದ್ದೇನೆ ಪ್ರೀತಿಸಿ ಮದುವೆ ಆದವರೇ ಪುಣ್ಯವಂತರು. ಅವರಷ್ಟು ಖುಷಿಯಾಗಿ ಇರೋರು ಯಾರು ಇಲ್ಲ, ಒಬ್ಬರಿಗೊಬ್ಬರು ತುಂಬಾ ಅರ್ಥ ಮಾಡಿಕೊಂಡು ಬದುಕುತ್ತಾರೆ ಅಂತ. ಪ್ರತಿ ಸಲ ನನ್ನ ಸ್ನೇಹಿತರು ಇದನ್ನು ಹೇಳುತ್ತಿದ್ದಾಗ ನನಗೂ ಯಾವುದಾದರೂ ಹುಡುಗಿಯನ್ನು ಪ್ರೀತಿಸಿ ಮದುವೆ ಆಗಬೇಕು ಅನ್ನಿಸುತಿತ್ತು. ಆದರೆ ನನ್ನ ಮುಸುಡಿಗೆ ಯಾವ ಹುಡುಗಿ ಬೀಳುತ್ತಾಳೆ ಅಂತ ಅಂದುಕೊಂಡು ಸುಮ್ಮನಾಗುತ್ತಿದ್ದೆ. ಹೇಗೋ ಜೀವನದಲ್ಲಿ ಇಷ್ಟವಿಲ್ಲದ ಮೆಕ್ಯಾನಿಕಲ್ ಇಂಜಿನಿಯರಿಂಗ್ ಓದಿ ತಂದೆ ತಾಯಿಯ ಕಾಟ ತಡೆದುಕೊಳ್ಳಲಾರದೆ ಬೆಂಗಳೂರಿಗೆ ಬಂದು ಒಂದು ಒಳ್ಳೆ ಕಂಪನಿ ಅಲ್ಲಿ ಕೆಲಸ ಹುಡುಕಿಕೊಂಡೆ. ಹೇಳಿಕೊಳ್ಳುವಷ್ಟು ಸಂಬಳವೇನು ಇರಲಿಲ್ಲ ಆದರೂ ಬೇರೆ ದಾರಿ ಇಲ್ಲದೆ ಕೆಲಸ ಮಾಡುತ್ತಿದ್ದೆ. ಬಂದ ಸಂಬಳದಲ್ಲೇ ಅಷ್ಟೋ ಇಷ್ಟೋ ದುಡ್ಡನ್ನು ಉಳಿಸಿ ಮನೆಗೆ ಕಳಿಸುತಿದ್ದೆ. ಹೀಗೆ ವರ್ಷಗಳೇ ಸಾಗಿದವು. ಈ ಕಡೆ ಕಂಪನಿ ಅಲ್ಲಿ ಕೆಲಸದ ಒತ್ತಡ ಆ ಕಡೆ ಮನೆಯಿಂದ ವಯಸ್ಸಾಗುತ್ತಿದೆ ನಿನ್ನ ಮದುವೆಗೆ ಹುಡುಗಿ ನೋಡಬೇಕು ಜಾಸ್ತಿ ಸಂಬಳ ಇರುವ ಉದ್ಯೋಗ ನೋಡಿಕೋ ಅನ್ನುವ ಕಾಟ. ಪ್ರತಿ ಸಲ ಮನೆಯಿಂದ ಈ ಮಾತು ಕೇಳಿದಾಗ ಇಲ್ಲೇ ಬೆಂಗಳೂರಿನಲ್ಲಿ ಯಾವುದಾದರು ಒಂದು ಹುಡುಗಿಯನ್ನು ನೋಡಿಕೊಳ್ಳೋಣ ಅನ್ನಿಸುತಿತ್ತು. ಏನು ಮಾಡುವುದು ಈ ಕೆಲಸದ ಒತ್ತಡದಲ್ಲಿ ಹುಡುಗಿಯನ್ನು ಹುಡುಕಿಕೊಳ್ಳುವುದು ಇರಲಿ ಕಣ್ಣು ಎತ್ತಿ ನೋಡುವುದಕ್ಕೂ ಮನಸ್ಸು ಬರುತ್ತಿರಲಿಲ್ಲ.

ಕೊನೆಗೊಂದು ದಿನ ನನ್ನ ಸ್ನೇಹಿತ ಮನೋಜ್ ಅವನು ಕೆಲಸ ಮಾಡುವ ಕಂಪನಿ ಅಲ್ಲಿ ಕೆಲಸ ಕಾಲಿ ಇದೆ ಇಂಟರ್ವ್ಯೂಗೆ ಬಾ ಒಳ್ಳೆ ಸಂಬಳ ಇದೆ ಎಂದು ಹೇಳಿದ. ಹೇಗೋ ಈ ಕೆಲಸ ನನಗೆ ಸಿಕ್ಕರೆ ಸಾಕು ದೇವರೇ ಅಂತ ಅಂದುಕೊಂಡು ಹೋಗಿಯೇಬಿಟ್ಟೆ. ಅಂದುಕೊಂಡಂತೆ ಆ ಕೆಲಸ ನನಗೆ ಸಿಕ್ಕೆಬಿಟ್ಟಿತು. ಮೊದಲು ಪಡೆಯುತ್ತಿದ್ದ ಸಂಬಳಕ್ಕಿಂತ ಹೆಚ್ಚು ಇತ್ತು. ಮೊಬೈಲ್ ಕೈಗೆತ್ತಿಕೊಂಡು ಈ ಖುಷಿ ಸಮಾಚಾರವನ್ನು ಮನೆಯಲ್ಲಿ ತಿಳಿಸೋಣ ಎಂದು ಕರೆ ಮಾಡಿದರೆ ನಮ್ಮ ಅಮ್ಮ ಮೊದಲು ಹೇಳಿದ ಮಾತು ಏನು ಗೊತ್ತಾ? ಹಾಗಾದ್ರೆ ಹುಡುಗಿ ನೋಡ್ತೀವಿ ಮದುವೆ ಆಗಿಬಿಡು ಅಂತ. ಅದೇನ್ ಮದುವೆ ಮದುವೆ ಅಂತ ಸಾಯ್ತೀರಾ ಇವಾಗ ತಾನೇ ಒಳ್ಳೆ ಸಂಬಳ ಇರುವ ಕೆಲಸ ಸಿಕ್ಕಿದೆ ಸ್ವಲ್ಪ ದಿವಸ ತಡೆದುಕೊಳ್ಳಿ ಎಂದು ರೇಗಾಡಿದೆ. ಸರಿ ಆಯಿತು ಬಿಡು ಅಂತ ಅಮ್ಮ ನನ್ನ ಮೇಲೆ ಕೋಪ ಮಾಡಿಕೊಂಡು ಕಾಲ್ ಕಟ್ ಮಾಡಿದಳು. ತಿರುಗಿ ಕಾಲ್ ಮಾಡುವ ಮನಸ್ಸು ನನಗೂ ಇರಲಿಲ್ಲ. ಹೋಗಲಿ ಬಿಡು ಆಮೇಲೆ ಮಾಡಿದರೆ ಆಯಿತು ಅಂತ ಸುಮ್ಮನಾದೆ.

ಅದೊಂದು ಭಾನುವಾರದ ದಿನ ನನ್ನ ಸ್ನೇಹಿತನೊಬ್ಬನ ಮದುವೆಗೆ ಹೋಗಿದ್ದೆ 5 ವರ್ಷಗಳಿಂದ ಒಬ್ಬ ಹುಡುಗಿಯನ್ನು ಅವನು ಪ್ರೀತಿಸುತಿದ್ದನಂತೆ, ಅವನ ಮನೆಯಲ್ಲಿ ಅವರ ಪ್ರೀತಿಯನ್ನು ಒಪ್ಪಿಕೊಂಡು ಮದುವೆ ಮಾಡುತಿದ್ದರು. ಅವರ ಜೋಡಿಯನ್ನು ನೋಡಿದಾಗ ಸ್ವಲ್ಪ ನನಗೆ ಹೊಟ್ಟೆಕಿಚ್ಚು ಆಯಿತು. ಯಾಕೆ ಅಂತೀರಾ? ತುಂಬಾ ಮುದ್ದು ಜೋಡಿ ಅವರದ್ದಾಗಿತ್ತು. ಎಷ್ಟೇ ಆಗಲಿ ಪ್ರೀತಿ ಮಾಡಿ ಮದುವೆ ಆಗುತ್ತಿದ್ದಾರೆ. ಅವರ ಜೀವನವು ಸುಖವಾಗಿರುತ್ತದೆ ಅಂದುಕೊಂಡು ಹೊರಟೆನು. ಅದೇ ಸಮಯದಲ್ಲಿ ನಮ್ಮ ಅಮ್ಮನ ಕರೆ ಬಂತು. ಇವಾಗ ಯಾಕೆ ಅಮ್ಮ ಕರೆ ಮಾಡುತ್ತಿದ್ದಾಳೆ ಏನೋ ವಿಷಯ ಇರಬೇಕು ಎಂದು ಬಂದಿದ್ದ ಕರೆಯನ್ನು ಸ್ವೀಕರಿಸಿದೆನು. ಮರುಕ್ಷಣವೇ ನಿನಗೆ whatsapp ಅಲ್ಲಿ ಒಂದು ಹುಡುಗಿಯ ಫೋಟೋ ಕಳಿಸಿದ್ದೇನೆ ಅದನ್ನು ನೋಡಿ ಹೇಗಿದ್ದಾಳೆ ಆ ಹುಡುಗಿ ಅಂತ ನನಗೆ ಹೇಳು ಅಂದಳು ಅಮ್ಮ.