ಕಳೆದುಹೋಗಿದ್ದ ಬಾಲ್ಯದ ಗೆಳೆಯ ಸಿಕ್ಕ ಕಥೆ..!

ಅವಾಗ ತಾನೇ ಶಾಲೆಯಿಂದ ಬಂದು ಮುಖ ತೊಳೆಯುತ್ತಿದ್ದೆ, ಅಮ್ಮನ ಕಿರುಚಾಟ ಶುರುವಾಯಿತು, ಬೇಗ ಬೇಗ ಮುಖ ತೊಳೆದು ಮಾಡಿರುವ ಮ್ಯಾಗಿ ತಿಂದು tutionಗೆ ತಯಾರಾಗು, ಅದು ಬಿಟ್ಟು ಆ ಪಕ್ಕದ ಮನೆಯ ಸತೀಶನ ಜೊತೆ ಆಟ ಆಡುವುದಕ್ಕೆ ಹೋದರೆ ಅಪ್ಪನಿಗೆ ಹೇಳಿ ನಿನಗೆ ಶಿಕ್ಷೆ ಕೊಡಿಸುತ್ತೇನೆ. ಮೊದಲೇ ಆಯಾಸವಾಗಿದೆ ಅದರಲ್ಲಿ ನಮ್ ಅಮ್ಮನ ಕಿರುಚಾಟ ಬೇರೆ, ನೀವೇ ಹೇಳಿ ನಾನು ಏನ್ಮಾಡಲಿ ಸತೀಶನ ಬಿಟ್ಟು ಇರೋಕೆ ನನಗೆ ಆಗಲ್ಲ ನಾವಿಬ್ಬರು ತುಂಬಾ ವರ್ಷಗಳಿಂದ ಒಳ್ಳೆಯ ಸ್ನೇಹಿತರು. ತಲೆಗೆ ಹತ್ತದೆ ಇರುವ ವಿದ್ಯೆ ಕಲಿತು ನನ್ನ ಸಮಯ ಹಾಳು ಮಾಡಿಕೊಳ್ಳುವುದಕಿಂತ ಸತೀಶನ ಜೊತೆ ಇದ್ದರೆ ಆಟವಾದರು ಆಡಬಹುದು. ಟ್ಯೂಷನ್ ಹೋಗುತ್ತೇನೆ ಅಂತ ಹೇಳಿ ಸತೀಶನ ಜೊತೆ ಆಡುವುದಕ್ಕೆ ಮೈದಾನಕ್ಕೆ ತೆರಳಿ ಅಪ್ಪನ ಕೈಯಲ್ಲಿ ಎಷ್ಟೋ ಸಲ ಸಿಕ್ಕಿಹಾಕಿಕೊಂಡು ಒದೆ ತಿಂದಿದ್ದೇನೆ. ಇಷ್ಟೆಲ್ಲಾ ಆದರೂ ಅವನ ಜೊತೆ ಆಡುವದು ಮಾತ್ರ ನಿಲ್ಲಿಸೋಕೆ ನನ್ನಿಂದ ಸಾದ್ಯವಿಲ್ಲ. ಅಂದ ಹಾಗೆ ನಾನು ಯಾರು ಅಂತ ಕೇಳುತಿದ್ದೀರಾ..? ನನ್ನ ಹೆಸರು ಸುಧಾ, ಮನೆಯಲ್ಲಿ ಎಲ್ಲರು ಪ್ರೀತಿ ಇಂದ ರಾಣಿ ಎಂದು ಕರೆಯುತ್ತಾರೆ, ಯಾಕೆ ಅಂತೀರಾ? ನಾನು ನಮ್ ಅಪ್ಪನ ಒಬ್ಬಳೇ ಮುದ್ದಿನ ಮಗಳು ಅದಕ್ಕೆ.

ಅಂದ ಹಾಗೆ ಯಾಕೆ ನಾನು ಸತೀಶನ ಜೊತೆ ಬಹಳ ಆಟ ಆಡುತ್ತೇನೆ ಎಂದು ಕೇಳುತಿದ್ದೀರಾ? ಏನು ಮಾಡಲಿ ನಮ್ಮ ಕಾಲೋನಿಯಲ್ಲಿ ಇರುವ ಶ್ವೇತ ಮತ್ತು ಗ್ರೀಷ್ಮ ನನ್ನ ಜೊತೆ ಆಟ ಆಡಲು ಬರುವುದಿಲ್ಲ, ಅವರು ಪುಸ್ತಕದ ಹುಳಗಳು, ಯಾವಾಗ ನೋಡಿದರು ಕಬ್ಬಿಣಕ್ಕೆ ಅಂಟಿಕೊಂಡಿರುವ ಆಯಸ್ಕಾಂಥದಂತೆ ಪುಸ್ತಕಕ್ಕೆ ಅಂಟಿಕೊಂಡಿರುತ್ತಾರೆ. ಇದನ್ನು ನೋಡಿಯೇ ನನ್ ಅಮ್ಮ ಅವರನ್ನು ನೋಡಿ ಕಲೆತಿಕೋ ಎಂದು ಬೈಯುತ್ತಿರುತ್ತಾರೆ. ಆದರೆ ನನಗೆ ಓದು ಅಂದರೆ ಒಂದು ಕಿಲೋಮೀಟರ್ ಓಡಿ ಹೋಗಬೇಕು ಅನ್ನಿಸುತ್ತದೆ. ನನ್ನ ಹಾಗೆ ಸತೀಶನು ಕೂಡ, ಅದಕ್ಕೆ ನಂಗೆ ಸತೀಶನ ಜೊತೆ ಆಟ ಆಡುವುದಕ್ಕೆ ತುಂಬಾ ಇಷ್ಟ.